కళదప్పెనో ప్రియసఖా.

గజల్ 3614.

సూర్యునకే మేలుచేయు..మేధస్సది అందేమా..!

పరిశోధనలకు సంస్కృతి..బలిచేయుట ఆపేమా..! 

ఉదయారుణ గగనమెంత..కళదప్పెనో ప్రియసఖా.. 

ఎగిరిపోవు ప్రాణాలకు..రక్షణింత ఇచ్చేమా..! 

పశుపక్షుల ఆలనలో..పాలనలో సంబరమే.. 

సకలజీవ పరిరక్షణ..ఉత్సవాలు చేసేమా..! 

పుట్టుగుడ్డు పాపాయిని..విసిరేస్తూ తల్లులెలా.. 

మహిళా దినోత్సవాలకు..పరమార్థం చాటేమా..! 

"కరోనా"ను ఎదిరించగ..డ్రగ్గేదో కావాలా.. 

గుడ్లూ మాంసం చక్కగ..మానేయగ తలచేమా..! 

ఈ మాధవ గజల్ గుండె..విశ్వప్రేమ కంజీరా.. 

అక్షరాల చెలిమిపూల..వనములింక పెంచేమా..!