అర్థమేల వెతికేవో

482..
చిన్ని పాప హాసాలకు ~ అర్థమేల వెతికేవో..?!
స్వచ్చమైన స్నేహాలకు ~ రంగులేల వెతికేవో..!?
మనసుకన్న వెర్రి అడవి ~ వేరొక్కటి లేదు సుమా..!
అసలు ప్రేమ దీపాలకు ~ మచ్చలేల వెతికేవో..!?
ప్రతి పూవూ పాడుతోంది ~ అమృతమధుర గీతాలను..!
పరిమళించు రాగాలకు ~ స్వరములేల వెతికేవో..!?
పల్లెపల్లె వింతశోభ ~ పట్నంలో దొరికేనా..!
సంప్రదాయ గొబ్బిళ్ళకు ~ లొసుగులేల వెతికేవో..!?
పుస్తకాలు చదువలేక ~ బద్దకాన్ని వదలలేక..
పలు విద్యలు శాస్త్రాలకు ~ తప్పులేల వెతికేవో..!?
విశ్వములో వెలుగొందగ ~ 'మాధవ'నిధి అందాలోయ్..!
శ్వాసదారి నాదాలకు ~ ఊసులేల వెతికేవో..!

మాధవరావు కోరుప్రోలు. 
హైదరాబాద్,
https://te.wikipedia.org/wiki/కోరుప్రోలు_మాధవరావు