పూల బాల

580 //
కాంతిలోక లతవు నీవు..కలతదేల పూల బాల..!?
భువికి దిగిన దెందులకో..మరపదేల పూల బాల..!?
మోడు చూడు విరగబూసె..నీవు తనను చేరగానె..!
మనసులోని భావమేదొ..తెలుపదేల పూల బాల..!?
ముచ్చటైన దేవకాంత..నీవైతే వగపేలా..?!
ప్రియుని జాడ తెలియునులే..చింతదేల పూల బాల..!?
నిన్ను నీవు తెలుసుకోగ..సమయమాయె చిన్నదాన..!
నిప్పులాంటి భవిత చూడ..వెరపదేల పూల బాల..!?
వసంతాలు కరిగిపోయె..యవ్వనాలు కాలిపోయె..!
ప్రేమోదయ సంధ్య ఇదే..తెలియదేల పూల బాల..!?
పలకరించు ఆ'మాధవ' వేణువేది ఓ రాధా..!?
బృందావని అడుగుతుంటె..పలుకదేల పూల బాల..!?

మాధవరావు కోరుప్రోలు
హైదరాబాద్
https://te.wikipedia.org/wiki/కోరుప్రోలు_మాధవరావు