తెల్పుతాయి

593..
కనుపాపల భాషేదో..రెప్పలెట్ల తెల్పుతాయి..?!
గాలి ఎదన గొడవేదో..శ్వాసలెట్ల తెల్పుతాయి..?!
ప్రేమదారి నడిపేదీ..ప్రేమగాక మరి ఏదో..!?
స్నేహానికి గడపేదో..చూపులెట్ల తెల్పుతాయి..?!
చిరునవ్వుల వెన్నెలలే..చెలికన్నులు కురిసేనా..?!
ఈ జీవన స్వరమేదో..పలుకులెట్ల తెల్పుతాయి..?!
ఆమె మనసు తెలియాలని..వెర్రితనం ఎందుకటా..?!
తీపి మనోరథమేదో..పెదవులెట్ల తెల్పుతాయి..?!
మౌనసాక్షి అయ్యేందుకు..మానసమే తోడు సుమా..!
ఈ జగాన నిజమేదో..వలపులెట్ల తెల్పుతాయి..?!
'మాధవు'నకు నేర్పాలా..వేణువెలా ఊదాలో..?!
ప్రతి జన్మకు వరమేదో..ఊహలెట్ల తెల్పుతాయి..?!

మాధవరావు కోరుప్రోలు
హైదరాబాద్
https://te.wikipedia.org/wiki/కోరుప్రోలు_మాధవరావు