గుర్తులేదు అసలు

4597..గజల్. 
ఎపుడు నిన్ను చూశానో..గుర్తులేదు అసలు..! 
అప్పటి నుండి మనసుపై..పట్టులేదు అసలు..! 
అంతరాలు అంతస్తుల..గొడవ ఆపుటెలా.. 
ఈ మతాలు కులాలకే..సిగ్గులేదు అసలు..! 
ఇష్టాలను చంపుకునే..విద్య నేర్చుకొందు.. 
ప్రేమలోన పడుటవలన..సుఖములేదు అసలు..! 
కన్నీటిని దిగమింగుతు..ఉండవద్దు మనము.. 
మౌనానికి సాటివచ్చు..మధువులేదు అసలు..! 
సమాజాన్ని వెలివేసే..దివ్యశక్తి ప్రేమ.. 
మనసులు బలిపశువులైన..తిరుగులేదు అసలు..! 
మనచెలిమిని గాలికూడ..వేరుచేయ లేదు.. 
నా శ్వాసల శ్వాసనీవు..అడ్డులేదు అసలు..! 
ఓ మాధవ నీ గజలే..చెలియవలపు పాట.. 
నీ పూజకు భక్తిగాక..సుమములేదు అసలు..!

మాధవరావు కోరుప్రోలు
హైదరాబాద్
https://te.wikipedia.org/wiki/కోరుప్రోలు_మాధవరావు