నా ప్రేయసి..

 గజల్..3636.

వికారాలు తొలగించే..జ్ఞానమొసగె నా ప్రేయసి..! 

మరణభయం కాల్చివేయు..నిప్పునొసగె నాప్రేయసి..! 

ఈ జగత్తు కన్నతల్లి..'శార్వరి'యని తెల్పె తాను.. 

సంప్రదాయ పరిరక్షణ..కవచమొసగె నాప్రేయసి..!

హింసాత్మక చర్యలింక..మానమంటు హెచ్చరించె.. 

సమభావన పండించే..హృదయమొసగె నాప్రేయసి..!

తను ఉగాది కోకిలలా..కొలువుతీరె నా మదిలో.. 

సుస్వరాల వెల్లువకే..వలపులొసగె నాప్రేయసి..! 

చక్రధ్వజ మెత్తెనుగా..'శార్వరి'కే స్వాగతమని.. 

ఈ మానవ మేధస్సుకు..సవాళ్ళొసగె నాప్రేయసి..! 

మరి మాధవ గజల్ నిధిని..పోషించే వనరాణిరొ.. 

నవవసంత రాగాలకు..గంధమొసగె నాప్రేయసి..!