తరుణమిదే..! 

గజల్ 3686.

సామూహిక దీపశక్తి..చాటదగిన తరుణమిదే..! 

దివ్యమౌన వేదశక్తి..చూపదగిన తరుణమిదే..! 

దురహంకార చర్యలకు..గుణపాఠం తప్పదులే..

మనభారత జ్ఞానశక్తి..వెలుగదగిన తరుణమిదే..! 

సమరవాంఛలెల్ల కాల్చు..శాంతిమార్గ దర్శకులం.. 

పరమాద్భుత స్నేహశక్తి..పంచదగిన తరుణమిదే..! 

సంప్రదాయ మధురిమలను..కాచుకునే పనే మనది.. 

స్వచ్ఛమైన ప్రేమశక్తి..తెలుపదగిన తరుణమిదే..! 

ఆధిపత్య దుశ్చర్యలు..నిలువరింప చేద్దామిక..

ఆధ్యాత్మిక అమృతశక్తి..కదపదగిన తరుణమిదే..! 

అసలు సాధుతత్వమేదొ..ప్రకటించర మాధవుడా.. 

నిత్యసత్య కరుణశక్తి..కురియదగిన తరుణమిదే..!