ఈదులాడ వాదేలా

562..
వ్యాఖ్యానపు జలధులలో..ఈదులాడ వాదేలా..?!
కాంతిపూల వనములలో..చిందులాడ వాదేలా..?!
ఎవరికెవరు ఎమౌదురొ..!..చెలిమి కన్న సంపదేమి..?!
పలకరించు గాలులతో..ముద్దులాడ వాదేలా..?!
చినుకుపూల హాసాలను..తేనియలుగ పొందేమే..!
నీలిమబ్బు నీడలతో..ఊసులాడ వాదేలా..?!
ఇంద్రధనువు పరువాలను..వర్ణించే పని ఏమి..?!
నిదురెరుగని జాబిలితో..ఆటలాడ వాదేలా..?!
పారిజాత సోయగాల..రసజగమే ఏలాలా..!?
నవవసంత మాధురితో..నటనలాడ వాదేలా..?!
చిరునవ్వుల వేణువూదు..'మాధవు'డే నీవైతే..!
ప్రణయకావ్య నాయికతో..చతురులాడ వాదేలా..?!

మాధవరావు కోరుప్రోలు
హైదరాబాద్
https://te.wikipedia.org/wiki/కోరుప్రోలు_మాధవరావు