మిగిలిందా ఏమైనా..! 

గజల్ 3757.

సవాలుగా తీసుకోగ..మిగిలిందా ఏమైనా..! 

ఈ ఉనికికి ఒక అర్థం..దొరికిందా ఏమైనా..! 

వరములిచ్చు దైవమెవరు..లేరంటే వినవుకదా.. 

అంటరాని తనమన్నది..పెరిగిందా ఏమైనా..! 

ఈ విశ్వం దైవమయం..ఇంతకన్న సత్యమేది.. 

బ్రతుకు శుద్ధ నాటకమని..తేలిందా ఏమైనా..! 

లెక్కలెన్ని వేస్తావో..జన్మలెన్ని ఎత్తావో.. 

నాది-నేను' గొడవ సరిగ..కాలిందా ఏమైనా..! 

మధుశాలకు దారిసరిగ..చూపువారు ఎవరంటా.. 

నిద్రమత్తు కాస్తైనా..వదిలిందా ఏమైనా..! 

శవంపైని కఫనులాగ ..చెలి అశ్రువు ఇంకెందుకు.. 

మాధవుడే నీ తోడని..తెలిసిందా ఏమైనా..!