మట్టిప్రేమ ముద్రలన్ని

510..
చినుకు చినుకు గుండెకెరుక మట్టిప్రేమ ముద్రలన్ని..!
చెలియ మనసు గూటికెరుక గాలిప్రేమ ముద్రలన్ని..!
తపియించే ముచ్చటలో మైమరపే వరమేమో..!?
పరిమళించు దారికెరుక చిలిపిప్రేమ ముద్రలన్ని..!
తాళలేని వానవిల్లు మౌనమయే వేళలలో..
నీలిమబ్బు గుంపుకెరుక నీటిప్రేమ ముద్రలన్ని..!
అంతులేని ఆశ తీర్చు ఆ వెన్నెల కొలువులోన..
నిదురించే శిల్పికెరుక అగ్నిప్రేమ ముద్రలన్ని..!
కలలరాగ వీచికలకు తలలూపే నవ్వులలో..
మునిగితేలు హంసకెరుక సాక్షిప్రేమ ముద్రలన్ని..!
ఆ'రాధకు కావాలట తన 'మాధవ' చిరునామా..!
పలుకరాని మధువుకెరుక తేటిప్రేమ ముద్రలన్ని..!

మాధవరావు కోరుప్రోలు
హైదరాబాద్
https://te.wikipedia.org/wiki/కోరుప్రోలు_మాధవరావు