ప్రేమ విరుల తోటలోన

514..
ఎన్ని సార్లు పుట్టినామొ..ప్రేమ విరుల తోటలోన..!?
కలసి ఏల మరచినామొ..స్నేహ సిరుల తోటలోన..!?
కలహంసల ప్రణయసీమ..మానసమని గుర్తించక..
కలహమేల సలిపినామొ..కలల మరుల తోటలోన..!?
సొంతమేది లేదన్నది..తెలిసి తెలిసి పంతాలా..!?
ఏ కర్మల సోలినామొ..భ్రమల గిరుల తోటలోన..!?
పసిడికాంతి తలపుచేను..పండించే ముచ్చటలో..
పోరులెన్ని చేసినామొ..రాగఝరుల తోటలోన..!?
హాస్యాస్పద సప్తపదుల..అష్టపదుల క్రీడలలో..
ఎంత మునిగి తేలినామొ..భోగపరుల తోటలోన..!?
వైభోగపు భువనాలకు..నడిపించే 'మాధవుడా..!'
వింతలెన్ని గాంచినామొ..శ్వాస తరుల తోటలోన..!?

మాధవరావు కోరుప్రోలు
హైదరాబాద్
https://te.wikipedia.org/wiki/కోరుప్రోలు_మాధవరావు