కవితలు

గజిబిజి లోకంలో బిజీబిజీ లైఫ్లు

పక్కపక్కనే ఉన్నా పట్టించుకోలేని 

బిజీ షెడ్యూలు!

ఆకాశంలో తారలా

అందనంత దూరాన

అందంగా కనిపించే జీవితాలు!

 అంతరాలతో అలమటించే లైఫ్ స్టైలు!

కనుచూపు మేరలో కవ్వించే పర్వతాలైనా 

కనపడని లావాణి మోస్తున్న హృదయాలు!

ఎవరి కష్టం వారికే ఎవరెస్టు

మోసేవాడికే తెలుస్తుంది దాని ఎఫెక్ట్ !

తెలుసుకోలేని మూర్కిస్టులకు  

నిలబడిన రెండు అడుగుల నేల ఎప్పుడూ చీపెస్ట్

పోయాక చేరే ఆరడుగుల నేల తెలిపే రియలిస్టిక్ !

ఉన్నది పొందలేని బ్లైండ్నెస్

పోయేవరకు వదలలేని ఎన్వియస్

పాలపుంత లోని గ్రహాలు

శాస్త్ర విజ్ఞానములో గ్రహంతరాలు

శాస్త్రంలోని నవగ్రహాలు 

దశ దిశలను పాలించే అధిపతులు!

కోరిన వరం కొంగుబంగారం కాగా

గ్రహాల అనుగ్రహం ఉందని

రవి రాచబాట చూపాడని

రాహు కేతువులు పగ బట్టలేదని

గురువుగారి గురి ఉందని 

శని గారు శపించ లేదని 

లావాలా పొంగి పోకు!

కాస్త కష్టానికే గ్రహ స్థితి గతి తప్పిందని

ఆశలు అడుగంటాయి అని

అథ పాతాళానికి తొక్కాయని

 ఇక నీ పని సమాప్తం అని 

గగ్గోలు పెట్టకు!

జరిగేది... జరగబోయేది

శీర్షిక : జర భద్రం బిడ్డా

అప్పుడే వర్షం అప్పుడే ఎండా
క్లారిటీ లేని కాలానికి
ఏ ఋతువును నిందించాలి!

అవే కళ్ళు అదే మనుషులు
అంతలోనే రంగులు మార్చే నైజాన్ని
ఏ ఊసరవెల్లితో సరిపోల్చాలి!

కాలాన్ని మార్చిన మనుషులో...
కాలానుగుణంగా మారుతున్న మనుషులో
చెప్పలేని స్థితి!

అవసరం నేర్పిన వైఖిరో
అత్యాశతో నేర్చిన వేషమో గాని
ఆస్కార్కు తగ్గని నట విన్యాస ప్రదర్శనది!

నిజానికి నీడలాగ సాగే అబద్ధపు సౌదాలకు
 నిజమే ఉలిక్కిపడి
 అగ్నిపరీక్ష చేసుకునే అయోమయ దుస్థితి!

శీర్షిక: పలకరింపు 
పలకరింపులోని మాధుర్యం
ఎండలో వెన్నెల కురిసినట్లు కాకపోయినా
ఎడారిలో ఒయాసిస్లా సేద తీర్చకపోయినా
మనసుకు హాయినిస్తే చాలు
గుండె ధైర్యాన్ని ఇచ్చే మాట నీదవ్వాలి!

తేనె పూసుకున్న కత్తిలా
మోచేతికి తగిలిన దెబ్బలా
మాటలోని మర్మం గుండెను గాయం చేస్తుంటే
అర్థం కాని వ్యంగ్యమైనా అభిమానం 
వెంటపడి జోరీగలా తరుముతుంటే...
మాటలే తూటాలై బాధిస్తుంటాయి!

శీర్షిక: కవితాక్షరం 

అక్షరం  నేస్తం కాదు
మది మోయలేని భావాలు 
గుండెను పిండేస్తే
 నరనరాలను తెంపేస్తే
 వచ్చే...ఆవేశమో
ఆక్రందనో
అనుభవసారమో...
అక్షరమై వెల్లివిరుస్తుంది
మనసును తేలిక పరుస్తుంది!

ఆ అక్షరాలలోని గుబాళింపు 
ఆకలింపు చేసుకుంటేనే గానీ తెలియదు!
అనుభవాల చెట్టుకు
పూసిన కాయలు రుచి చూస్తేనే గాని తెలియదు

శీర్షిక : అంతర్మధనం 

నలిగిన మనసు కొస ఊపిరితో  
ఆశగా చూస్తుంది!
మళ్లీ భూభ్రమణంలో
గతాన్ని తిరిగి మార్చాలని
అనుమానపు దుమ్ముదులిపేయాలని
అడ్డుగోడగా నిలిచిన అహాన్ని కూల్చేయాలని!

 క్షీణిస్తున్న చంద్రునిలోని కాంతి పుంజంలా
నమ్మకమనే వెన్నెలను రాహు మింగినట్టు 
మనసులో చెలరేగే తుఫానుకి 
స్వాభిమానమనే కెరటాల పోటు తగిలాయేమో...
కండరాల బిగువులో కడలి కూడా 
కాలువగా కనిపించింది!

ఎన్నో చిరునవ్వులు 
పెనవేసుకున్న ప్రేమానుబంధాలు 
అందంగా అమర్చుకున్న అనురాగాలు!
మరెన్నో బాధల భారాలు
పంచుకున్న భుజస్కంధాలు 
 అడుగులో అడుగై నడిచిన పాదాలు... 
అంతలోనే అర్థం కాని అపార్థాలు
అల్లుకున్న అపోహలు 
కనుమరుగై పోయినా ప్రేమాభిమానాలు!
 అందమైన జీవితాలకు తగిలిన దిష్టి దోషమో
ఆలోచన లోపమో... 
మనసుకు అనుమానపు దుమ్ము పట్టి
తుడిచిన వదలని మరకై 
కనిపించని సత్యాలు!
అంతరంగ పోరలలో మిగిలిన అవశేషాలు!
సరి చేసుకోలేని అగాధాలు 
జీవితచిత్రాన్ని ఛిద్రం చేసిన ఆనవాలు
వడ్రంగి పిట్టలా తొలుస్తున్న జ్ఞాపకాలు 

కరోనా వచ్చిన వేళ

పైసా పైసా కూడబెట్టి ఇంటిని గడుపుతున్న వేళ

ఇంక బతుకులు మారుతాయననుకుంటున్న వేళ

మహమ్మారి కరోనా అంటూ పని లేని వేళ

పొట్ట కూడు దొరకడం కష్టం అయిన వేళ

బతుకు మారకపోగ దిగజారిపోయిన వేళ

ఇదంతా పీడకలలా మారితే బాగుండు ఒక వేళ 

నెలవల సహజ,

చిత్తూరు జిల్లా.

సైనికా నీకు వందనం

తనకంటు ఒక కుటుంబం ఉందని మరచి - దేశాన్ని తన కుటుంబంగా మార్చుకున్న ఓ సిపాయి నీకు నా వందనం

నువ్వు నాకు అన్నవు కావు తమ్ముడు కావు కనీసం బంధువు కూడా కాదు - కానీ నా రక్షణ కోసం అంతలా పోరాడుతున్న ఓ సైనికా నీకు నా వందనం

నేను మూడు పూటలా తిని కంటి నిండా నిద్రపోవడం కోసం - భయంకరమైన క్లిష్ట పరిస్థితులను సైతం భరిస్తున్న ఓ ధైర్యశాలి నీకు నా వందనం

స్వార్థం అహంకారం గర్వంతో నిండిన నాకోసం - ఏ స్వార్థం లేకుండా అందరూ నావాళ్లే అని చనిపోతానని తెలిసినా నా సంరక్షణ కోసం పరితపిస్తున్న ఓ త్యాగశీలి నీకు నా వందనం

ముదిమి ఈడు

కూటికి కరువైన - నీ కడుపును కాల్చానా

నేడు కలిమికి కర్తవైన - నేను కానరాక కష్టమయ్యానా,

సర్వ సంపదలు అంతరించిన-  నీ సమృద్ధికి స్వస్తి పలకాన

నేడు సంపదతో తులతూగుతున్న - నేను సమస్యగా మరానా,

భారమైన బతుకు లాగలేకున్నా -  నీ భవితను బీడు చేశానా

నేడు భాగ్యవంతుడవైనా -  నేను భరించలేని భారమయ్యానా,

చెమటధారలు కారుతున్న - చిన్నలోటు నీకు చేశానా

నేడు చక్రవర్తిలా చలామణిఅయిన - నేను చిమ్మటగా మారానా,